२००३ मध्ये ” न्यू जर्सी “…
अमेरिका येथील
“मराठी विश्व.. साहित्य कुंज “कार्यक्रमात .. मना अर्जुना.. या कवितेचे वाचन केले होते.
….. मना अर्जुना !….
मना अर्जुना असा
बावरून नको जाऊ
तीव्र जीवन लढा
घाबरून नको जाऊ!…
अंतर बाह्य जीवनात
संघर्षच असतो
टळत नाही कोणाही
अटळच तो असतो !…
अर्थाविना जीवनात
काहीच अर्थ नसतो
जो तो अर्थामागे
धावतच असतो ! …
कधी यश हाती
अपयशही येते
जीवनाच्या लढाईत
सोसावेच लागते! …
पूर्व सोडून पश्चिमेला
परदेशी जावे जरी
ओझे समस्यांचे
नित्य डोईवरी! …
देश बदलला तरी
नशीब बदलत नसतं
यश अपयशाला
तोंड द्यायचं असतं ! …
बदलतात प्रकार
प्रश्न तेच असतात
जा कुठेही पळसाला
माने तीनच असतात ! …
परिवर्तन बाह्यांगी
अंतरी लढाच असतो
खरंच का तृप्त मी?
प्रश्न सुटत नसतो! …
अंगी कस्तुरी गंध
मृगा कळत नाही
अंतरी कृष्ण आहे
का रे कळत नाही? ! …
म्हणूनच बा मना
एकच तत्व खरे
अर्जुनच असतो रे
आपण सदा सारे ! …
निर्भय पाऊल टाक
युद्ध सूत्रधार तूच
तूच रथी अर्जुना
कृष्ण सारथी तूच ! …
…. प्रतिभा गारटकर.
*
