बारामती न्यायालयाचा दुहेरी हत्याकांडात जन्मठेपेचा निकाल
बारामती, दि. २ जुलै : बारामती येथील जिल्हा व सत्र न्यायाधीश-१ यांनी दुहेरी हत्याकांड प्रकरणातील आरोपी प्रमोद ऊर्फ पप्पू अंकुश पवार (रा. वेणूनगर, वाकड, जि. पुणे) याला जन्मठेपेची (सश्रम कारावास) शिक्षा सुनावली आहे. न्यायालयाने आरोपीला भारतीय दंड संहिता कलम ३०२ अंतर्गत जन्मठेप व ₹५,००० दंड, तसेच कलम १७६ व १७७ अंतर्गत प्रत्येकी सहा महिन्यांच्या साध्या कारावासाची शिक्षा ठोठावली.
या प्रकरणात ३० जुलै २०२० रोजी दौंड तालुक्यातील खुटबाव येथे महिला मनीषा जाधव आणि गुलचंद निकम यांची लाकडी काठी व कोयत्याने वार करून हत्या करण्यात आली होती. गुन्ह्यानंतर आरोपीने स्वतःची ओळख लपवण्यासाठी तपास अधिकाऱ्यांना खोटे नाव सांगितल्याचेही तपासात निष्पन्न झाले.
फिर्यादी पोपट बाबूराव कांबळे यांच्या तक्रारीवरून यवत पोलीस ठाण्यात गुन्हा दाखल करण्यात आला होता. तपास पूर्ण झाल्यानंतर न्यायालयात दोषारोपपत्र दाखल करण्यात आले.
सरकार पक्षातर्फे विशेष सरकारी वकील सुनील ईश्वर वसेकर यांनी बाजू मांडली. त्यांनी एकूण १२ साक्षीदार तपासले. प्रत्यक्षदर्शी साक्षीदार बालाबाई देवीदास जाधव यांच्या साक्षीला न्यायालयाने महत्त्व दिले.
या प्रकरणाचा तपास पोलीस निरीक्षक संतोष तासगावकर यांच्या मार्गदर्शनाखाली पोलीस अधिकारी सागर माने यांनी केला. तपासात पोलीस नाईक वेणूनाथ बोरे यांनी सहकार्य केले.
