निरा नदीच्या पाण्यासाठी तीन साखर कारखाने एकवटले; शेतकऱ्यांच्या हक्काच्या पाण्यासाठी एकजूट!

0
3

निरा नदीच्या पाण्यासाठी तीन साखर कारखाने एकवटले; शेतकऱ्यांच्या हक्काच्या पाण्यासाठी एकजूट!

नीरा डाव्या कालव्यातूनच दोन आवर्तने सोडण्याची आग्रही मागणी; पाण्याचा अपव्यय टाळून शेवटच्या शेतकऱ्यापर्यंत पाणी पोहोचवण्यावर भर

; यंदा पावसाचे प्रमाण कमी झाल्याने बारामती आणि इंदापूर तालुक्यातील शेतीसमोर पाणीटंचाईचे गंभीर संकट उभे राहिले आहे. उन्हाळ्यात शेतकऱ्यांची पिके वाचवण्यासाठी आणि शेतीला हक्काचे पाणी मिळवून देण्यासाठी आता तीन प्रमुख सहकारी साखर कारखाने एकवटले आहेत. नीरा नदीच्या पाणीवाटपाचा प्रश्न ऐरणीवर आला असतानाच, नीरा डाव्या कालव्यातून नियोजनानुसार दोन आवर्तने सोडावीत, अशी ठाम भूमिका श्री छत्रपती, सोमेश्वर आणि माळेगाव सहकारी साखर कारखान्यांच्या प्रतिनिधींनी घेतली आहे.
इंदापूर तालुक्यातील सराटी परिसरातील शेतकऱ्यांनी शेतीसाठी पाणी मिळावे, या मागणीसाठी नुकतेच रास्ता रोको आंदोलन केले होते. या आंदोलनाच्या पार्श्वभूमीवर शेतकऱ्यांच्या पाण्याचा प्रश्न अधिक तीव्र झाला आहे. या प्रश्नावर मार्ग काढण्यासाठी श्री छत्रपती सहकारी साखर कारखान्याच्या गेस्ट हाऊसवर महत्त्वपूर्ण बैठक पार पडली. श्री छत्रपती कारखान्याचे अध्यक्ष पृथ्वीराज जाचक यांच्या अध्यक्षतेखाली झालेल्या या बैठकीत शेतकऱ्यांना हक्काचे पाणी मिळालेच पाहिजे, यावर सर्वांनी एकमत व्यक्त केले.
या बैठकीस सोमेश्वर सहकारी साखर कारखान्याचे अध्यक्ष राजवर्धन शिंदे, माळेगाव सहकारी साखर कारखान्याचे संचालक योगेश जगताप, छत्रपती कारखान्याचे उपाध्यक्ष शिवाजी निंबाळकर यांच्यासह संचालक मंडळातील सदस्य आणि पदाधिकारी उपस्थित होते.
बैठकीत बोलताना पृथ्वीराज जाचक म्हणाले की, यंदा पावसाचे प्रमाण अत्यल्प राहिल्याने शेतकऱ्यांसमोर पाण्याचे मोठे संकट निर्माण झाले आहे. गेल्या आठवड्यात पुणे येथे झालेल्या कालवा सल्लागार समितीच्या बैठकीत कृषिमंत्री दत्तात्रय भरणे, पाटबंधारे मंत्री राधाकृष्ण विखे-पाटील आणि तीनही कारखान्यांच्या अध्यक्षांच्या उपस्थितीत रब्बी हंगामासाठी दोन आवर्तने सोडण्याचा निर्णय झाला आहे. त्यामुळे ठरल्याप्रमाणे पाणी मिळणे आवश्यक आहे.
नदीत पाणी सोडण्याऐवजी कालव्यातून पाणी देण्याची मागणी
इंदापूर तालुक्याच्या पूर्व भागातील शेतकरी हे आपलेच बांधव आहेत. त्यांनाही शेतीसाठी पाणी मिळाले पाहिजे, ही आमची भूमिका आहे. मात्र, नीरा नदीतून पाणी सोडल्यास नदीपात्रातील खड्डे आणि असमान प्रवाहामुळे पाणी ठिकठिकाणी साचून राहण्याची शक्यता आहे. परिणामी शेवटच्या टोकावरील शेतकऱ्यांपर्यंत पाणी पोहोचणार नाही आणि उपलब्ध पाण्याचा अपव्यय होईल. त्यामुळे सर्व शेतकऱ्यांना समन्यायी पद्धतीने पाणी मिळावे, यासाठी नीरा डाव्या कालव्यातूनच ठरल्याप्रमाणे दोन आवर्तने सोडण्यात यावीत, अशी मागणी जाचक यांनी केली.
शेतकऱ्यांच्या हितासाठी कारखान्यांची एकजूट
पाणी हा शेतकऱ्यांच्या शेतीचा आणि पर्यायाने सहकारी साखर कारखानदारीचा महत्त्वाचा आधार आहे. उसासह इतर पिकांचे भवितव्य पाण्याच्या उपलब्धतेवर अवलंबून आहे. त्यामुळे पाण्याचे योग्य नियोजन होऊन प्रत्येक भागातील शेतकऱ्यांना न्याय मिळणे गरजेचे आहे. उपलब्ध पाण्याचे योग्य व्यवस्थापन, काटकसरीने वापर आणि शेवटच्या शेतकऱ्यापर्यंत पाणी पोहोचवणे, हीच सध्याची प्रमुख गरज असल्याची भूमिका बैठकीत मांडण्यात आली.
सोमवार, दि. १६ नोव्हेंबर रोजी पुणे येथे होणाऱ्या कालवा समितीच्या शासकीय बैठकीत पाणीवाटपाचा प्रश्न पुन्हा उपस्थित केला जाणार आहे. या बैठकीतील निर्णयानंतर पुढील आंदोलनाची दिशा ठरविण्यात येईल, असा इशाराही देण्यात आला आहे.
शेतकऱ्यांच्या हक्काच्या पाण्यासाठी तीन साखर कारखान्यांनी घेतलेली एकजुटीची भूमिका महत्त्वपूर्ण मानली जात आहे. आता शासन आणि पाटबंधारे विभाग या मागणीवर काय निर्णय घेतात, याकडे बारामती व इंदापूर तालुक्यातील शेतकऱ्यांचे लक्ष लागले आहे.

Previous articleबारामतीतील विद्यार्थी, पालकांना पुण्यातील युवा महोत्सवासाठी मोफत बससेवा
Bhavnagari
मी संपादक श्री.संतोष नारायण शिंदे बारामती इंदापूर भिगवन फलटण सातारा सांगली सह संपूर्ण महाराष्ट्र व विविध राज्यातून भारत देशातून दिल्ली मुंबई नागपूर गोवा विदर्भ पश्चिम महाराष्ट्र खानदेश उत्तर प्रदेश बंगाल विविध राज्यातून भावनगरी या वेबपेजच्या माध्यमातून सामाजिक, सार्वजनिक, सांस्कृतिक, क्रीडा, आरोग्यदायी, शेती, विविध विषयक जनहितार्थ वेब पेज पोर्टल वरती लोकहितार्थ बातमी, लेख जनोपयोगी प्रकारचे कथा-कथन कविता, सांस्कृतिक, क्रीडा विविध विषयावरती लेखन या भावनगरी वेब पेजच्या माध्यमातून जनहितार्थ प्रकाशित करत आहे...

LEAVE A REPLY

Please enter your comment!
Please enter your name here