दोन ड्रम, ४७८ किलो गांजा अन् ओडिशापर्यंत पोहोचलेले जाळे!
बारामती पोलिसांचा सहा महिन्यांचा तपास फळाला; विकी विजय कांबळे अखेर अटकेत..!
प्रतिनिधी : बारामती : – जळोचीतील शेतात सापडलेल्या दोन गूढ ड्रममधील तब्बल ४७८.९५० किलो गांजाच्या प्रकरणाचा तपास अखेर महत्त्वाच्या टप्प्यावर पोहोचला आहे. सहा महिन्यांच्या अथक तपासानंतर बारामती शहर पोलिसांनी या प्रकरणातील आरोपी विकी विजय कांबळे याला २ सप्टेंबर रोजी रात्री अटक केली. न्यायालयाने त्याला ७ सप्टेंबरपर्यंत पोलीस कोठडी सुनावली आहे.
जळोचीतील एका शेतात २८ फेब्रुवारी रोजी पोलिसांना दोन मोठे प्लास्टिक ड्रम आढळले. त्यामध्ये तब्बल ४६५ पॅकेट्स आणि ४७८.९५० किलो गांजा सापडला. या गांजाची अंदाजे किंमत २ कोटी ३९ लाख ४७ हजार ५०० रुपये होती. एवढ्या मोठ्या प्रमाणातील गांजा निर्जन शेतात नेमका कुणी आणला, कुठून आला आणि त्यामागे कोणाचे नेटवर्क आहे, हा पोलिसांसमोर मोठा प्रश्न होता.
ड्रम सापडले; पण ‘मालक’ गायब!
पोलिसांनी तपासाची चक्रे वेगाने फिरवत सीडीआर, डम्प डेटा, आयएमईआय मॅपिंग, मोबाईल लोकेशन, सीसीटीव्ही फुटेज, वाहनांच्या हालचाली आणि संशयितांच्या परस्पर संपर्कांचे विश्लेषण सुरू केले. सहआरोपींची चौकशी आणि तांत्रिक पुराव्यांची सांगड घालत तपास पुढे सरकला.
या तपासात प्रकाश उर्फ पक्या मोहन काटे, समाधान धर्मराज गायकवाड, प्रिन्सकुमार मुन्ना सिंग, राहुल कल्याण गोरे, विकी विजय कांबळे, संग्राम उर्फ चंदन सिंग आणि जॉकी माझी यांचे धागे पोलिसांच्या हाती लागले. यापैकी काही आरोपींना यापूर्वीच अटक करण्यात आली होती.
तपासाचा धागा थेट ओडिशात!
तपास पुढे जात असताना विकी कांबळेचा ओडिशातील जॉकी माझीशी संपर्क असल्याचे समोर आले. त्यामुळे जळोचीत सापडलेला गांजा हा स्थानिक पातळीवरील व्यवहार नसून ओडिशातून महाराष्ट्रात येणाऱ्या आंतरराज्यीय पुरवठा साखळीचा भाग असल्याचा संशय बळावला.
गांजाची खरेदी, वाहतूक, साठवणूक आणि पुढील वितरणातील विकी कांबळेची भूमिका तपासाच्या केंद्रस्थानी आली.
सांगलीतही १३४ किलो गांजासह कांबळे पोलिसांच्या जाळ्यात
दरम्यान, विकी कांबळेच्या हालचालींची माहिती पुणे ग्रामीण स्थानिक गुन्हे शाखेला मिळाली. सहाय्यक पोलीस निरीक्षक कुलदीप संकपाळ यांनी ही माहिती सांगली पोलिसांना दिली.
त्यानंतर सांगली स्थानिक गुन्हे शाखा आणि कुपवाड एमआयडीसी पोलिसांनी संशयित इनोव्हा वाहनाचा पाठलाग करून विकी कांबळेला ताब्यात घेतले. वाहनाची झडती घेतली असता ६६ पॅकेट्स आणि एका पिशवीत तब्बल १३४ किलो गांजा आढळून आला. या कारवाईत गांजासह वाहन, मोबाईल व इतर साहित्य असा ४२ लाख ६३ हजार ५०० रुपयांचा मुद्देमाल जप्त करण्यात आला.
या तपासातूनही गांजा ओडिशातून आणल्याचे धागे समोर आले. त्यामुळे बारामतीतील ४७८ किलो गांजा प्रकरणाचा तपास आणखी खोलवर गेला.
बारामतीत आणखी २३ किलो गांजा; धागे पुन्हा त्याच नेटवर्ककडे
२१ मे रोजी गवारे चौक, फलटण रोड येथे पोलिसांनी आणखी एक कारवाई करत २३ किलो १० ग्रॅम गांजा जप्त केला. इनोव्हा क्रिस्टा वाहनातून गांजा आणणाऱ्या तिघांना पोलिसांनी ताब्यात घेतले.
या प्रकरणातही विकी कांबळे आणि संग्राम उर्फ चंदन सिंग यांच्याशी संबंधित धागे समोर आल्याने बारामतीतील दोन्ही मोठ्या एनडीपीएस गुन्ह्यांचा तपास एकमेकांशी जोडला गेला.
आकडा थक्क करणारा—बारामतीत ५०१ किलो, संबंधित कारवायांत ६३५ किलोपेक्षा अधिक गांजा
बारामती शहर पोलीस ठाण्यातील दोन गुन्ह्यांत मिळून तब्बल ५०१.९६० किलो गांजा जप्त झाला आहे.
त्यात सांगली-कुपवाड कारवाईतील १३४ किलो गांजाची भर पडल्याने संबंधित तपासातील जप्तीचा आकडा ६३५.९६० किलोपर्यंत पोहोचतो.
आता पोलिसांच्या रडारवर ‘पूर्ण सप्लाय चेन’
विकी कांबळेला २ सप्टेंबर रोजी रात्री १०.३० वाजता अटक करण्यात आली. ३ सप्टेंबर रोजी त्याला बारामती न्यायालयात हजर करण्यात आले. तपासी अधिकारी पोलीस उपनिरीक्षक रत्नदिप भंडारे यांनी गांजाचा मूळ स्रोत, ओडिशापासून बारामतीपर्यंतची वाहतूक साखळी, वापरलेली वाहने, मोबाईल व डिजिटल पुरावे, आर्थिक व्यवहार आणि स्थानिक वितरण नेटवर्क यांचा तपास करण्यासाठी पोलीस कोठडीची मागणी केली.
न्यायालयाने आरोपीला ७ सप्टेंबरपर्यंत पोलीस कोठडी मंजूर केली आहे.
आता पोलिसांसमोर सर्वात मोठे आव्हान आहे ते म्हणजे या नेटवर्कचा ‘सोर्स-टू-डेस्टिनेशन’ पूर्ण उलगडा करणे. ओडिशातील मूळ पुरवठादार कोण? महाराष्ट्रात गांजा कोण आणत होते? बारामतीत साठवणूक कुठे केली जात होती? पैसा कुठून आणि कुठे फिरत होता? या प्रश्नांची उत्तरे तपासातून शोधली जात आहेत.
दोन ड्रमपासून सुरू झालेला तपास आता आंतरराज्यीय गांजा नेटवर्कच्या मुळापर्यंत पोहोचला आहे.
ही कारवाई वरिष्ठ अधिकाऱ्यांच्या मार्गदर्शनाखाली बारामती शहर पोलीस ठाण्याचे प्रभारी पोलीस निरीक्षक श्रीशैल चिवडशेट्टी यांच्या नेतृत्वाखाली करण्यात आली. सहाय्यक पोलीस निरीक्षक कुलदीप संकपाळ, तपासी अधिकारी पोलीस उपनिरीक्षक रत्नदिप भंडारे, श्रेणी पोलीस उपनिरीक्षक कारंडे तसेच बारामती शहर पोलीस ठाणे आणि पुणे ग्रामीण स्थानिक गुन्हे शाखेतील अधिकारी व अंमलदारांनी तपासात विशेष परिश्रम घेतले.
उर्वरित आरोपी, ओडिशातील पुरवठा साखळी, संग्राम उर्फ चंदन सिंग व जॉकी माझी यांची भूमिका तसेच आर्थिक आणि डिजिटल व्यवहारांचा तपास अद्याप सुरू आहे.
