माळेगाव सहकारी साखर कारखान्याची गतिमान यंत्रणा; सभासदांच्या मागणीनुसार रस्ता झाला मोकळा..!
मळद गाव परिसरातील सभासदांनी माळेगाव सहकारी साखर कारखान्याकडे रस्त्यालगत वाढलेल्या वेड्या बाभळीच्या काटेरी झाडांमुळे वाहतुकीस अडथळा निर्माण होत असल्याची मागणी केली होती. या मागणीची तात्काळ दखल घेत कारखान्याने जेसीबी मशीनच्या सहाय्याने रस्त्यावरील झाडे-झुडपे हटविण्याचे काम हाती घेतले आहे.
आज गवारे फाटा तसेच मायनर क्रमांक २ परिसरात वेड्या बाभळीची झाडे काढून रस्ता स्वच्छ व सुरक्षित करण्याचे काम सुरू करण्यात आले. या उपक्रमामुळे शेतकरी, वाहनचालक आणि ग्रामस्थांना मोठा दिलासा मिळाला आहे.
यावेळी सभासद नाना गावडे, श्रीराम परकाळे यांच्यासह परिसरातील अनेक शेतकरी उपस्थित होते. कारखान्याने सभासदांच्या मागणीला तत्पर प्रतिसाद देत काम सुरू केल्याबद्दल उपस्थितांनी समाधान व्यक्त केले. कारखान्याची ही कार्यक्षम आणि गतिमान यंत्रणा सभासदांच्या सेवेसाठी सदैव तत्पर असल्याचे यानिमित्ताने पुन्हा एकदा अधोरेखित झाले.
