‘योगसूत्र’ निरोगी आयुष्याचे… सोनालीताईंनी महिलांच्या आरोग्यासाठी उभी केली आरोग्याची दीपमाळ!
बारामती शहरात आरोग्याचे एक जिवंत स्तंभ म्हणून ज्यांचं नाव घेतलं जातं, त्या म्हणजे सौ. सोनाली राजेंद्र ठवरे मॅडम – एक समर्पित योग शिक्षिका, अल्ट्रा रनर, हाफ आयर्न वुमन, सायकलीस्ट, आणि ट्रेकर!
बारामती शहरातील नक्षत्र गार्डन येथे गेले दोन वर्षे त्या महिलांसाठी मोफत योग -वर्ग चालवत आहेत. सोमवार ते शनिवार, सकाळच्या प्रसन्न वेळेत त्या नियमितपणे या वर्गांचे आयोजन करतात. त्यांच्या या वर्गाचा प्रमुख उद्देश आहे – “महिलांच्या आरोग्याविषयी जागृती.”
“महिला म्हणजे कुटुंबाचा कणा, आणि कणा जर मजबूत असेल तर अख्खं कुटुंब निरोगी राहतं” – हे ब्रीद मनाशी बाळगून सोनालीताई योगाची वाट साऱ्यांपर्यंत पोहोचवत आहेत.
योगासने, प्राणायाम, सूर्यनमस्कार यांसारख्या व्यायाम प्रकारांद्वारे त्या महिलांचा मानसिक, शारीरिक आणि आध्यात्मिक विकास घडवून आणत आहेत. त्यांच्या शब्दांत सांगायचं झालं, तर “मनाचं सामर्थ्य वाढलं की शरीर आपोआप साथ देतं.”
कृतीतून उदाहरण घालणारी ‘योगिनी’
सोनालीताईंचं वैयक्तिक जीवन देखील प्रेरणादायी आहे. त्या स्वतः अल्ट्रा रनर, हाफ आयर्न वुमन, अनेक अवघड ट्रेक्स पूर्ण केलेल्या, आणि सर्वात विशेष म्हणजे काश्मीर ते कन्याकुमारी 4,070 किमी सायकल प्रवास करून “बेटी बचाव बेटी पढाओ” चा संदेश देशभर पोहोचवणाऱ्या महिला आहेत!
महिलांना बनवत आहेत मॅरेथॉनवीरांगना!
आजच्या घडीला त्या अनेक महिलांना रनिंगचसह ‘योगा’ चे प्रशिक्षण देतात. त्यांच्या मार्गदर्शनाखाली अनेक महिला भगिनींनी मॅरेथॉन स्पर्धांमध्ये भाग घेतला आणि बक्षिसंही जिंकली आहेत. महिलांना ट्रेकिंगची ओढ निर्माण करून त्या त्यांना दुर्गभ्रमणाच्या मोहिमा देखील घडवत आहेत.
आरोग्यसंवर्धनासाठी निःस्वार्थ सेवा सोनालीताईंच्या योगसेवेची आणि समाजकार्याची दखल घेत 22 जून रोजी मराठवाड्यातील संभाजीनगर येथे त्यांना ‘योगरत्न पुरस्कार’ देऊन गौरविण्यात येणार आहे. हा पुरस्कार केवळ त्यांच्या कार्याचा सन्मान नसून, महिलांसाठी उभ्या राहिलेल्या एका लढवय्या शक्तीचं कौतुक आहे.
“योगातून आरोग्य, आणि आरोग्यातून समृद्धी” – या मंत्राला सोनालीताईंनी खऱ्या अर्थानं मूर्त स्वरूप दिलं आहे. सोनालीताई ठवरे – आरोग्यवर्धिनी, आरोग्यप्रवर्तक, आणि स्फूर्तीप्रदीप!
अशा या सोनालीताईंचं कार्य खरंच कौतुकास्पद, प्रेरणादायी आणि महिलावर्गासाठी अत्यंत मोलाचं आहे. त्यांच्या सहकाऱ्यांचं एकच वाक्य सार्थ वाटतं –
“सोनालीताईंनी जे काही सुरू केलं आहे, त्याचं कौतुक जितकं करावं तितकं कमीच आहे!” ‘योगसूत्र’ – निरोगी आयुष्याचं मंत्रवाक्य!
‘योगसाधना’ – समृद्धीच्या दिशेने उचललेलं एक पाऊल!
