बारामतीत श्रीमद् भागवत कथा ज्ञान यज्ञ सप्ताह सोहळा उत्साहात …
बारामती : समस्त साधक परिवार, बारामती यांच्या वतीने सिद्धयोगाचार्य, भागवताचार्य, चैतन्यघन परमपूज्य सद्गुरु श्री हरिभाऊ जोशी निटूरकर महाराज(भाऊ महाराज), हैदराबाद यांच्या श्रीमद् भागवत कथा ज्ञान यज्ञ सप्ताहाचे आयोजन मोठ्या भक्तिमय वातावरणात करण्यात आले.
मंगळवार, दि. ४ ऑगस्ट ते रविवार, दि. ९ ऑगस्ट २०२६ या कालावधीत आयोजित करण्यात आलेल्या या सप्ताहात दररोज सकाळी ८ ते ११ या वेळेत संहिता पठण, तर सायंकाळी ४ ते ७ या वेळेत श्रीमद् भागवत कथा निरूपण झाले. कथा श्रवणासाठी बारामती व परिसरातील भाविकांनी मोठ्या संख्येने उपस्थित राहून अध्यात्मिक ज्ञानाचा लाभ घेतला.
श्रीमद् भागवत कथा ही श्री दत्तात्रेयांचा प्रथम अवतार श्रीपाद श्रीवल्लभ यांच्या मूळ चरित्राचे मराठी अनुवादक असलेल्या परमपूज्य सद्गुरु श्री हरिभाऊ जोशी महाराज यांच्या मार्गदर्शनातून सादर करण्यात आली. त्यांच्या अमृतवाणीतून भागवत कथेचे निरूपण ऐकताना भाविक भक्तिरसात तल्लीन झाले.
सप्ताहाच्या निमित्ताने सोमवार, दि. १० ऑगस्ट २०२६ रोजी सकाळी ८ ते ११ संहिता पठण व दुपारी ३ ते ६ भागवत कथा निरूपण आयोजित करण्यात आले. त्यानंतर सायंकाळी ७ ते रात्री ९ वाजेपर्यंत महाप्रसादाचे आयोजन करण्यात आले.
या संपूर्ण धार्मिक सोहळ्याचे आयोजन वीरशैव मंगल कार्यालय, बारामती येथे करण्यात आले होते. समस्त साधक परिवाराच्या अथक परिश्रमातून पार पडलेल्या या सप्ताहामुळे परिसरात भक्तिमय व अध्यात्मिक वातावरण निर्माण झाले होते.
कार्यक्रमाच्या यशस्वी आयोजनासाठी समस्त साधक परिवार व आयोजकांचे भाविकांकडून कौतुक करण्यात आले.
