“अश्रूंनी भारावली बारामती… ‘दादांच्या स्वप्नासाठी एकत्र या’—भावनिक सादेला प्रतिसाद”
संतोष शिंदे – भावनगरी
बारामती, दि. ०६ एप्रिल — पोटनिवडणुकीच्या पार्श्वभूमीवर २०१ बारामती विधानसभा मतदारसंघातील महायुतीचा सर्वपक्षीय कार्यकर्ता मेळावा कविवर्य मोरोपंत नाट्यगृह येथे अत्यंत भावनिक वातावरणात पार पडला. या मेळाव्यास राज्याचे उपमुख्यमंत्री मा. श्री. एकनाथजी शिंदे यांच्यासह विविध पक्षांचे आजी-माजी मंत्री, खासदार, आमदार, पदाधिकारी आणि कार्यकर्त्यांची मोठ्या संख्येने उपस्थिती होती.
मेळाव्यात दिवंगत लोकनेते अजितदादांच्या आठवणींनी संपूर्ण सभागृह भारावून गेले. “दोन महिन्यांपूर्वी आपण दादांना गमावले, ही केवळ आमच्या कुटुंबाची नाही तर संपूर्ण बारामतीची हानी आहे,” अशा शब्दांत भावना व्यक्त होताच अनेकांच्या डोळ्यांत अश्रू तरळले. दादांच्या जाण्याने बारामती पोरकी झाल्याची भावना प्रत्येकाच्या मनात प्रकर्षाने जाणवली.
यावेळी दादांचे कार्यकर्त्यांप्रती असलेले प्रेम आणि त्यांची कार्यशैली आठवत, “बेटा हो, कामाला लागा… मी कामाचा माणूस आहे,” हे त्यांचे नेहमीचे वाक्य सभागृहात पुन्हा घुमले आणि कार्यकर्त्यांना प्रेरित करून गेले.
दादांचे स्वप्न असलेले जागतिक दर्जाचे बारामती शहर घडवण्याचा निर्धार व्यक्त करत, त्यांच्या विकासदृष्टीला पुढे नेण्यासाठी सर्वांनी एकत्र यावे, असे आवाहन करण्यात आले. “दादांची जागा कोणीच घेऊ शकत नाही, पण त्यांची स्वप्ने पूर्ण करण्याची जबाबदारी आपली आहे,” असे स्पष्ट करण्यात आले.
कार्यक्रमादरम्यान अनेक दिग्गज नेत्यांनी दादांच्या आठवणींना उजाळा दिला. विशेषतः स्वर्गीय अजितदादा पवार यांच्या सौभाग्यवती सौ. सुनेत्रा पवार यांचे भाषण सुरू होताच सभागृहातील वातावरण अधिकच भावूक झाले. त्यांच्या शब्दांतून व्यक्त झालेल्या भावना ऐकताना अनेकांप्रमाणेच उपस्थितांच्या डोळ्यांत अश्रूंच्या धारा अनावर झाल्या.
साप्ताहिक भावनगरी बारामतीचे संपादक म्हणून उपस्थित असताना, “माझ्याही डोळ्यांतून अश्रू थांबत नव्हते; हीच खरी आदरांजली आणि श्रद्धांजली दादांच्या प्रति असावी,” असे मत व्यक्त करत, ही भावना केवळ वैयक्तिक नसून प्रत्येक बारामतीकराच्या मनातील असल्याचे जाणवले.
यावेळी जनतेसाठी खुला असलेला ‘जनता दरबार’ पुढेही कायम ठेवण्याचा शब्द देत, प्रत्येकाच्या अडचणी सोडवण्यासाठी कटिबद्ध राहण्याचे आश्वासन देण्यात आले. तसेच बारामतीच्या सर्वांगीण विकासासाठी सातत्याने प्रयत्न सुरू राहतील, असेही स्पष्ट करण्यात आले.
मेळाव्यात महायुतीतील सर्व नेत्यांनी दिलेल्या पाठिंब्याबद्दल कृतज्ञता व्यक्त करत, दादांच्या विचारांवर चालत बारामती आणि महाराष्ट्राच्या विकासासाठी समर्पितपणे कार्य करण्याचा संकल्प व्यक्त करण्यात आला.
दरम्यान, कालच्या या मेळाव्याने बारामतीकरांच्या भावना अक्षरशः अनावर केल्या. एका बाजूला दादांच्या आठवणी, तर दुसऱ्या बाजूला भविष्याची जबाबदारी—या दोन्हींच्या संगमातून भावनांचा महापूर उसळला होता.
“ही निवडणूक वैयक्तिक नसून दादांवर प्रेम करणाऱ्या प्रत्येक बारामतीकराची आहे,” या भावनिक संदेशाने मेळाव्याचा शेवट झाला, आणि उपस्थितांच्या मनात एकच भावना दृढ झाली—दादांच्या स्वप्नासाठी आता सर्वांनी एकदिलाने पुढे जाण्याची वेळ आली आहे.
