स्व. अजितदादा पवार यांच्या स्मरणार्थ सूर्यनगरीत भक्ती, संस्कार आणि समाजप्रबोधनाचा जागर
अनंत युवा प्रतिष्ठानचा गणेश फेस्टिवल२०२६ किर्तन महोत्सव उत्साहात; ह.भ.प. सोपानदादा कन्हेरकर महाराज यांच्या ओजस्वी कीर्तनाने भाविक मंत्रमुग्ध
बारामती, प्रतिनिधी : महाराष्ट्र राज्याचे स्व. उपमुख्यमंत्री अजितदादा पवार यांच्या पवित्र स्मृतीस समर्पित किर्तन महोत्सव २०२६ सूर्यनगरी, बारामती एमआयडीसी येथे अनंत युवा प्रतिष्ठानच्या वतीने गणेश फेस्टिवल२०२६ मोठ्या उत्साहात आणि भक्तिमय वातावरणात सुरू आहे. संस्थापक अध्यक्ष प्रवीण भैय्या माने व मित्रमंडळाच्या पुढाकारातून आयोजित करण्यात आलेल्या या महोत्सवाला बारामतीतील सुज्ञ नागरिक, महिला वर्ग, तरुणाई तसेच परिसरातील भाविकांचा उत्स्फूर्त प्रतिसाद मिळत आहे.
या महोत्सवातील एका विशेष कीर्तन सेवेत ह.भ.प. सोपानदादा कन्हेरकर महाराज यांनी आपल्या ओजस्वी आणि प्रभावी वाणीने उपस्थितांना मंत्रमुग्ध केले. त्यांच्या कीर्तनातून रामनाम, संतसंगती, धर्मसंस्कार, सदाचार, निष्ठा, माणुसकी आणि समाजप्रबोधनाचा संदेश उपस्थितांच्या मनावर ठसला.
कार्यक्रमाच्या प्रारंभी उपस्थित मान्यवरांच्या हस्ते श्री गणपती बाप्पाची आरती करण्यात आली. यावेळी पुणे जिल्हा परिषद माजी अध्यक्ष विश्वास नाना देवकाते, बारामती माजी पंचायत समिती सदस्य राहुल झारगड, पुणे जिल्हा राष्ट्रवादी काँग्रेस पार्टीचे उपाध्यक्ष प्रताप आबा पागळे, लडकत अकॅडमी बारामतीचे गणेश लडकत सर बारामती चे सी. ए. प्रितम पहाडे यांच्यासह विविध क्षेत्रातील मान्यवर उपस्थित होते.
‘नरदेहीचा हाचि मुख्य स्वार्थ…’ अभंगातून जीवनाचा खरा अर्थ
ह.भ.प. सोपानदादा कन्हेरकर महाराज यांनी संत एकनाथ महाराजांचा प्रसिद्ध अभंग घेत त्याचा भावार्थ उपस्थितांना समजावून सांगितला
“नरदेहीचा हाचि मुख्य स्वार्थ संतसंग करी परमार्थ
आणिक नाहीं पां साधन मुखीं हरि हरि स्मरण ”
मनुष्य जन्म हा केवळ भौतिक सुखासाठी नसून जीवनाचा खरा उपयोग परमार्थ, सदाचार आणि माणुसकीसाठी झाला पाहिजे. संतांचा सहवास आणि भगवंताचे नामस्मरण हे जीवनाला योग्य दिशा देणारे साधन आहे, असे महाराजांनी आपल्या निरूपणातून स्पष्ट केले.
धन, संपत्ती, सत्ता, प्रतिष्ठा आणि संसारातील मोह यांच्यामागे धावताना माणसाने जीवनाचा खरा उद्देश विसरू नये. शरीर नश्वर आहे; मात्र माणसाने केलेले चांगले कर्म, दिलेले प्रेम आणि समाजासाठी केलेली सेवा दीर्घकाळ स्मरणात राहते, असा भावनिक संदेश त्यांनी दिला.
“जरी पोखालें शरीर तरी तें केव्हाहीं जाणार…” या ओळीचा संदर्भ देत त्यांनी देहाचे नश्वरत्व स्पष्ट केले. त्यामुळे आयुष्य मिळाले आहे तोपर्यंत चांगले विचार, चांगले आचरण आणि समाजोपयोगी कार्य करण्याचे आवाहन त्यांनी केले.
सळसळत्या रक्ताला दिशा देणारे ओजस्वी विचार
महाराजांच्या कीर्तनात भक्तीबरोबरच तरुणाईला प्रेरणा देणारा ओजस्वी सूरही जाणवला. छत्रपती शिवाजी महाराजांचे मावळे आणि छत्रपती संभाजी महाराजांच्या जीवनातील निष्ठा, धैर्य आणि कर्तव्यभावना यांचा संदर्भ देत आपल्या तत्त्वांशी प्रामाणिक राहण्याचा संदेश त्यांनी दिला.
शूरवीरांच्या पराक्रमातून केवळ इतिहास ऐकायचा नसून त्यांच्या विचारांमधून प्रेरणा घेऊन वर्तमानात कर्तव्य बजावायचे आहे. देश, समाज आणि कुटुंबासाठी जबाबदारीने उभे राहणे, अन्यायाविरुद्ध आवाज उठविण्याची नैतिक ताकद निर्माण करणे आणि आपल्या संस्कृतीचा अभिमान जपत माणुसकी जपणे, हा संदेश त्यांच्या ओजस्वी निरूपणातून देण्यात आला.
धर्मसंस्कारातून पुढची पिढी घडविण्याचे आवाहन
रामनवमी, गुढीपाडवा, नागपंचमी, गणेशोत्सव यांसारख्या सण-उत्सवांच्या माध्यमातून पुढील पिढीला भारतीय संस्कृती, परंपरा आणि संस्कारांची ओळख करून देणे गरजेचे आहे, असे महाराजांनी सांगितले.
आपल्या धर्माविषयी श्रद्धा आणि अभिमान असावा; मात्र त्याचबरोबर इतरांच्या श्रद्धेचाही आदर केला पाहिजे. जातीभेदापेक्षा माणुसकी, परस्पर प्रेम, बंधुभाव आणि सामाजिक एकता मोठी आहे, असा संदेशही त्यांनी दिला.
भक्ती म्हणजे केवळ विधी नव्हे; माणुसकीची सेवा
रामनामाचा जप, संतांचे विचार आणि धार्मिक परंपरा यांचा उल्लेख करताना महाराजांनी भक्तीचा व्यापक अर्थ स्पष्ट केला. भक्ती ही केवळ मंदिरात किंवा धार्मिक विधींमध्ये मर्यादित न राहता ती माणुसकी, सेवाभाव, परोपकार आणि चांगल्या आचरणातून व्यक्त झाली पाहिजे, असे त्यांनी सांगितले.
वाईट संगतीपासून दूर राहून चांगल्या विचारांच्या आणि संतांच्या सहवासात राहावे. संतांचे विचार केवळ ऐकून टाळ्या वाजविण्यापुरते मर्यादित न ठेवता ते आपल्या दैनंदिन जीवनात उतरविले पाहिजेत, असे आवाहन त्यांनी केले.
अजितदादांच्या स्मृतींना अनोखी मानवंदना
स्व. अजितदादा पवार यांच्या स्मरणार्थ आयोजित करण्यात आलेला हा किर्तन महोत्सव त्यांच्या स्मृतींना श्रद्धांजली अर्पण करण्याबरोबरच समाजात सकारात्मक विचारांची ज्योत पेटविणारा उपक्रम ठरत आहे. त्यांच्या स्मृतींना उजाळा देताना भक्ती, संस्कार आणि समाजसेवेचा संदेश जनमानसापर्यंत पोहोचविण्याचा प्रयत्न या माध्यमातून होत आहे.
किर्तनातील विचार ऐकताना अनेक भाविक भावूक झाले. अजितदादांच्या आठवणी, समाजासाठी काम करण्याची प्रेरणा आणि संतांच्या शिकवणुकीचा संगम या सोहळ्यात अनुभवायला मिळाला.
महिला, तरुणाई आणि नागरिकांची लक्षणीय उपस्थिती
या किर्तन सोहळ्याला सूर्यनगरी परिसरातील महिला मंडळींसह तरुण वर्ग आणि नागरिक मोठ्या संख्येने उपस्थित होते. कीर्तनातील प्रत्येक विचाराला उपस्थितांकडून उत्स्फूर्त प्रतिसाद मिळत होता. टाळ-मृदंगाचा निनाद, रामनामाचा गजर आणि महाराजांच्या ओजस्वी वाणीमुळे संपूर्ण परिसर भक्तिमय वातावरणाने भारावून गेला.
विशेषतः तरुणांनी मोठ्या संख्येने उपस्थित राहून कीर्तनातून मिळणारे संस्कार आणि प्रेरणा आत्मसात केली. धार्मिक कार्यक्रमाच्या माध्यमातून तरुणाईला सकारात्मक विचार, इतिहासाची जाणीव, संस्कृतीची ओळख आणि सामाजिक जबाबदारीची जाणीव करून देण्याचा हा प्रयत्न असल्याची भावना नागरिकांनी व्यक्त केली.
अनंत युवा प्रतिष्ठानच्या कार्यकर्त्यांचे परिश्रम
अनंत युवा प्रतिष्ठानचे संस्थापक अध्यक्ष प्रवीण भैय्या माने यांच्या मार्गदर्शनाखाली मित्रमंडळ आणि प्रतिष्ठानचे कार्यकर्ते किर्तन महोत्सव यशस्वी करण्यासाठी परिश्रम घेत आहेत. परिसरातील भाविकांना कार्यक्रमाचा लाभ मिळावा, यासाठी नियोजनबद्ध पद्धतीने व्यवस्था करण्यात आली आहे.
किर्तन सेवा संपल्यानंतर श्री ह भ प सोपानदादा महाराज यांना साप्ताहिक भावनगरी दिवाळी विशेषांक भेट देताना..भावनगरी संपादक संतोष शिंदे पत्नी मीरा शिंदे व अनंत युवा प्रतिष्ठानचे संस्थापक अध्यक्ष प्रवीण भैय्या माने डॉ.शिर्के विविध मान्यवर
स्व. अजितदादा पवार यांच्या स्मरणार्थ आयोजित किर्तन महोत्सव २०२६ हा केवळ धार्मिक कार्यक्रम न राहता भक्ती, संस्कार, निष्ठा, माणुसकी आणि समाजसेवेचा संदेश देणारा उपक्रम ठरत आहे. रामनामाच्या गजरात, संतविचारांच्या सहवासात आणि शूरवीरांच्या इतिहासातून प्रेरणा घेत समाजाला चांगल्या विचारांची दिशा देण्याचा हा सोहळा बारामतीकरांच्या मनात विशेष ठसा उमटवत आहे.
